Aminado si Philippine Institute of Volcanology and Seismology (PHIVOLCS) Director Teresito Bacolcol nga mas mabaskog ang pagsigabong kag mas mataas man ang pagtimbook sang aso sa liwat nga paglupok sang Bulkan Kanlaon.
Suno diri, ini na ang ikalima nga Moderately Explosive Eruption subong nga 2026.
Pahayag ni Bacolcol nga kun mahina lamang ang tunog sang paglupok, wala sang booming sound, kag manubo ang plume ukon aso nga ginbuga, ini ang minor eruption lamang.
Samtang moderately explosive eruption nmaan kun mas makusog apang wala nagalapaw sa duha ka minutos.
Maglapaw na sa duha ka minutos mahimo nga mapasaka sa major eruption ang status, depende sa marecord nga parameters.
May nabatyagan man nga pagtay-og sang duta sa Brgy Mailum, Bago City.
Suno kay Bacolcol, depende sa huyop sang hangin kun diin magatupa ang abo.
Panugyan sini nga magsuksok sang facemask bangod makahalit sa lawas ang ashfall kasubong man ang usbong sang asupre.
Pahanumdom sini nga dapat wala na sang tawo sa sulod sang 4km Permanent Danger Zone, samtang magpreparar naman ang mga yara sa sulod sang 6km danger zone bangod mahimo magpatuman sang force evacuation kun magsaka sa Alert Level 3 ang status sang bulkan.
Samtang pahanumdom man sini sa mga nagapuyo sa kilid sang suba nga mag-aligmat ilabi na kun may pag-ulan bangod sa posibilidad sang lahar flow.
