Ginpahayag sang Convenor sang Bantay Senado nga tion na ni Vice President Sara Duterte nga sabtun ang mga nakita nga anomalya sa mga nakaligad nga trial.
Sa interview sang Bombo Radyo Bacolod kay Atty Dino de Leon, madamo na sang mga napresentar nga ebidensya nga dapat masabat ni VP Sara.
Lakip na diri ang sa bahin sang illgotten wealth, kaangay sang P4.4 billlion nga gwa-sulod sa bank account ni VP Sara apisar nga P98 million lamang ang gindeklarar niya nga net worth.
Dugang pa ang isyu sa Cale88 nga kompanya kun sa diin may financial interest si VP Sara, nga nagabatun sang masobra P300 million gikan sa Chinese government.
Pahayag ni De Leon nga ini ang dako nga risgo sa national security kun mapamatud-an nga nagabatun sang kwarta gikan sa China si VP Sara bangod siya ang may access sa National Intelligence briefing.
Ginpaanggid sini ang sitwasyon kay Hudas nga gintraidor si Hesus, bangod suno diri, samtang may mga Coast Guard nga nagkala-utdan sang tudlo kag ginabombahan sang water cannon, ang Bise Presidente ang nagtabatun lamang sang kwarta gikan sa China.
Dapat man nga ipaathag ni VP Sara kun ngaa wala ini sang declared nga cash on hand.
Samtang sa isyu sa confidential funds, dapat naman nga masabat ni VP Sara ang mga kwestyonable nga pangalan, wala sang resibo nga transaksyon, paghatag sang kwarta kay Lachina nga indi man authorized personnel, kag ang dako nga paggastos sang kwarta sa sulod lamang sang pila ka inadlaw.
Nagapati si De Leon nga mabaskog na ang mga ebidensya, gani nagakadapat man nga indi nalang talakayon ang isyu sang bribery, agud indi na mag-uyang sang oras sang publiko kag mas madasig nga makapagwa sang desisyon.
Panawagan ni De Leon nga pag-abot sa konstitusyon kag layi, nga indi mangin maka-Marcos, maka-Duterte, kag maka-Leni ukon dapat wala sang political color pag-abot sa accountability.
