Ginkumpirmar ni Philippine Institute of Volcanology and Seismology (PHIVOLCS) Director Teresito Bacolcol nga nakaeksperyensya sang light ashfall kag baho sang asupre ang pila ka mga Local Government Units sa Negros Occidental kasunod sang paglupok sang Bulkan Kanlaon.
Sa interview sang Bombo Radyo kay Bacolcol, may narecord nga ashfall sa La Carlota City partikular na sa Sitio Guintubdan, Barangay Ara-al nga naka-eksperyensya man sang sulfuric smell.
Kasubong man ang banwa sang Salvador Benedicto kag pila ka bahin sang La Castellana.
Wala sang narecord nga ashfall sa San Carlos City apang may napanimahuan nga asupre sa upper portion sang Brgy Codcod.
Suno kay Bacolcol, ang plume nga ginbuga sang bulkan ang padulong sa north-northeast direction gani apektado ang mga nasambit nga mga lugar.
Nagluntad ang moderately explosive eruption alas-12:46 kag natapos alas-12:48.
Ginsundan naman ini suno kay Bacolcol sang ash emission activity nga naglawig sang duha ka oras kag 41 ka minutos, halin alas-12:49 sang udto tubtob alas-3:30 sang hapon.
Sang Oktubre 1, nagpagwa sang advisory ang Phivocls bangud sa pagtaas sang seismic activity kun sa diin nakarecord san 28 volcano-tectonic (VT) earthquakes.
Gani suno diri, may yara na sang indication nga magalupok ang Bulkan apang wala mahibaluan kun san-o ini matabo.
Bangud nagapabilin sa Alert level 2 ang Bulkan, ginalauman naman sini nga posible nga masundan ang paglupok sang Bulkan.
Ini ang ikalima nga narecord nga paglupok sang Bulkan Kanlaon sa subong nga tuig.
Suno diri, ginabantayan subong ang posible nga pag-ulan nga makatuga sang lahar flow.
Gani, ginapanugyan sang Phivolcs head nga maghalong kag mag-aligmat indi lamang sa mga pumuluyo nga yara sa 4km permanent danger zone kundi kasubong man sa mga malapit sa suba nga mahimo maagian sang lahar flow.
Panugyan man sini sa mga pumuluyo nga magsunod sa instructions sang LGU kag mangin updated sa mga abiso nga ipaggwa sang Phivolcs.
