Tatlo ang nakaagom sang minor injuries matapos nga gin-arado sang pick-up truck ang tricycle kag walo ka motorsiklo sa Bacolod Negros Occidental Economic Highway sa Purok San Jose 1, Brgy. Sum-ag, Bacolod City, alas-4:30 Domingo sang kaagahon.
Suno kay Police Major Elmer Bonilla, chief sang Traffic Enforcement Unit sang Bacolod City Police Office, halin sa east to west direction ang Toyota Hi-Lux apang natulugan ang 18-anyos nga babayi nga driver nga isa ka estudyante gani nabungguan sini ang tricycle kag nagdiretso sa mga motorsiklo nga nakaparada sa higad sang dalan.
Napilasan ang driver sang tricycle nga Robert Samorillo, 49-anyos, kag ang duha niya ka pasahero nga lunsay mga lalaki kag menor de edad.
Sa karon, ginahulat nga makaangkon sang amicable settlement sa magtimbang nga bahin.
Suno kay Bonilla, indi MassKara Festival-related ang insidente bangud wala man naghalin sa festival site ang driver nga residente sang Brgy. Pahanocoy, Bacolod City.
Nagpanugyan naman si Bonilla sa mga driver nga indi nalang magdrive kun natuyo ukon wala sa maayo nga kondisyon.
