Ginpahayag sang negosyante nga kinahanglan may yara gid sang detalye sa pagpatuman sang short term solutions sa power crisis sa Visayas.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry (MBCCI), sa ginpatigayon nga Joint Congressional Public Hearing sang Department of Energy sang Oktubre 3, ginapakamaayo sini nga naka-come up sang immediate solution kag long term solution ang mga District kag Partylist Representatives upod sa nagkalainlain nga ahensya kag opisina nga may kaangtanan sa energy sector.
Madumduman nga ginpahayag ni Bacolod City Lone District Alfredo “Albee” Benitez nga maga-deploy ang DOE sang battery storage systems kag power barges bilang short term solution.
Suno kay Carbon, gina-rehab nalang ang mga power barges kag ginalauman sini nga ini ang madeploy subong nga tuig ukon sa 1st quarter sang 2027.
Suno diri, duha ka mga power barges ang ginalauman nga ideploy.
Isa diri sa Negros Island Region samtang ang isa naman ang ideploy sa Bohol.
Ginpahayag ni Carbon nga namensyonar man ni DOE Secretary Sharon Garin nga sila ang mangita sang portable ukon diesel plants nga makadugang sa supply sang kuryente.
Sa pihak sini, ginpahayag sang negosyante nga indi pa siya satisfied sa mga nakasugtan bangud suno sa iya, madamo sang plano apang wala pa sang concrete program kun san-o ini mapatuman.
Kinahanglan suno sa iya, may specific implementation plan kun sin-o ang maga-fund kag san-o ini matapos.
Ginapakamaayo ni Carbon nga may immediate solution sa power crisis sa Visayas apang suno sa iya, kinahalang gid may kaugalingon nga baseload power plant ang Negros Island Region.
