Ginkoronahan bilang Miss Bacolod Masskara 2026 ang kandidata sang Barangay Singcang Airport nga si Macy Alaine E. Albarico matapos gindominar ang 14 ka iban pa nga mga kandidata sa premier pageant sang ciudad.
Ang 24-anyos nga SK kagawad sa Brgy Alianza, Bago City, youth leader, kag environmental advocate, ang nakabaton sang P150,000 kag nakuha man ang Miss Congeniality award.
Ginkilala naman nga first runner-up si Julie Mikayla A. Borja sang Barangay Mansilingan, kag siya ang nakabaton sang P100,000, samtang ginhigadlan nga second runner-up si Ma. Zonora Ellyssa Curaza sang Barangay Sum-ag, sa diin siya ang nakabaton sang P50,000.
Ang Top 5 ang ginbug-usan nanday Kyla C. Aligaga sang Barangay Pahanocoy kag Daniella Louisse B. Merelos sang Barangay 32.
Sa Question and Answer round, ginhatagan pagtamod ni Albarico ang importansya sang pagpasanyog sang oportunidad kag kahigayunan para sa mga Bacolodnon nahanungod sa mga trabaho, seminars, kag access sa impormasyon, sang ini ang ginpamangkot kun ano ang luyag bag-uhon sa ciudad.
Si Albarico, nga graduate sang Bachelor of Science in Business Administration major in Financial Management, ang naga-trabaho subong bilang business process outsourcing (BPO) agent kag plano nga pagagamiton ang titulo sa pagpalapnag sang coastal conservation kag responsible waste management, ilabi na sa mga pamatan-on.
Samtang, nagdaug naman si Borja sang apat ka special awards nga ginalakipan sang Best in Festival Costume, Best in Gown, Best in Talent, kag Darling of Social Media.
Si Aaron Spencer Marin ang ginhingadlan bilang Best Festival Costume Designer para sa costume nga ginsuksok ni Borja, samtang nagdaug naman bilang Best Gown Design si Reina Caspe para sa gown nga ginsuksok ni Margarette Ymballa sang Barangay Taculing.
Ang Miss Photogenic award ang nakuha ni Curaza, samtang naangkon naman ni Aligaga ang Best in Production Number, kag Best in Swimwear si Lourdeth G. Codico sang Barangay Bata.
Nag-focus ang direksyon sang pageant sa pagselebra sa cultural identity sang ciudad paagi sa local nga landmarks kag mga simbolo, sa diin nagserbe bilang inspirasyon para sa Evening Gown Competition ang Bacolod City Public Plaza.
Para naman sa creative narrative sang kompetisyon, gingamit ang mga manika ukon doll bilang paglaragway sa women empowerment kag self-determination paagi sa pagkontrol sang kaugalingon nga identity.
Gintambongan naman ni Senator Risa Hontiveros ang okasyon kag gindumdum ang mga kabudlayan kag trahedya nga ginpangatubang sang Bacolod sang 1980, nga nangin inspirasyon sa pagtukod sang MassKara Festival bilang simbolo sang paglaum kag pagkamabakod.
Ang panel of judges ang ginlakipan nanday Bea Millan-Windorsky, nga maga-representa sang Pilipinas sa Miss Universe competition sa Puerto Rico, kag Asia Rose Simpson sang Miss World Philippines.
