Ginakahangawa ni President Ferdinand Marcos Jr. nga mahimo mangin isa ka national security threat ang gin-alegar pondo naggikan sa China nga ginbaton sang isa ka kompaniya nga gina-angot kay Vice President Sara Duterte pananglitan ini ang mapamatud-an.
Sa impeachment trial ni Duterte, ginkumpirmar sang Anti-Money Laundering Council (AMLC) nga ang kompaniya nga gina-link sa bise presidente kag sa iya bana, ang nakabaton sang P319 million gikan sa China kag Hong Kong.
Ang gin-alegar financial transactions ang ginpresenta sa impeachment court proceedings para sa Article II ukon ang alegasyon sa unexplained wealth ni Duterte.
Nagalaum si Marcos nga wala sang kamatuoran ang mga nasambit nga alegasyon batok sa bise presidente.
Suno kay Marcos, nagapatigayon na sa karon sang imbestigasyon ang Department of National Defense nahanungod sa mga alegasyon, kag ginhatagan sang pagtamod ang posible nga implikasyon sang gin-report nga transaksyon batok sa national security sang pungsod.
Sang Martes, ginpahayag sang National Security Council (NSC) nga ginaseryoso nila ang alegasyon kag maid-id nga usisaon ang financial inflows gikan sa China sa kompaniya nga may kaangtanan sa pamilya Duterte.
Suno naman sa tagpamaba sang bise presidente nga si Atty. Salvador Paolo Panelo, wala sang basehan ang tanan nga mga alegasyon.
