Ginpapuli ang mga estudyante sa Ramon Torres National High School sa ciudad sang Bago matapos makabaton sang pagpamahog Lunes,Oktubre 12.
Ang pagpamahog ang ginpost sang isa ka facebook user nga may pangalan nga “Nit Tagi”.
Nagpamahog ini nga pamatyon ang mga manunudlo kag estudyante kun indi mabuksan ang gate sang eskwelahan sa alas-3:00 Lunes, hapon.
Sa interview sang Bombo Radyo Bacolod Police Captain Bonifacio Galvez Jr Ang Deputy Chief of Police sang Bago City Police Station, ginatumod pa ang nagpalapta sang shooting threat.
Suno kay Bonifacio ang eskwelahan na mismo ang nagkansela sang klase.
Samtang panugyan sini sa mga ginikanan nga bantayan ang aktibidad sang ila mga kabataan.
Wala nagpatigayon sang kanselasyon sang klase ang Victorias National High School sa pihak sang nabaton nga pamahog Lunes sang hapon.
Sa interview sang Bombo Radyo Bacolod kay PLt. Enrique Casila- Deputy Chief of Police sang Victorias City Police Station, ginpanugyanan sang eskwelahan nga nakadepende na sa mga ginikanan kun paeskwelahon ang ila mga kabataan matapos ang nabaton nga pamahog.
Suno kay Casila, nagapadayon man ang imbestigasyon sang mga kapulisan.
Suno diri, sa paglantaw sini gincopy paste lamang ang threat sa Bago City kag ginpadala sa Victorias National High School paagi sa social media.
Ginatumod pa sang Cybercrime Unit ang may kahimuan sini.
Panugyan sini sa mga pumuluyo nga indi gilayon magpati sa kaangay nga mga mensahe kag i-verify dapat sa mga kapulisan kag likawan na ang pag-share sini.
