Nagpanugyan ang Coast Guard Station Northern Negros Occidental sa mga pasahero sa nagahilapit nga highlights sang Masskara Festival 2026.
Sa interview sang Bombo Radyo kay Coast Guard Station Northern Negros Occidental Commander Artzell Anacan, normal pa ang sitwasyon sa mga pantalan kag madutay pa ang mga pasahero.
Apang, ginalauman sini ang pagdamo sang mga pasahero sa Biyernes kag Sabado, bangud sa pagsulod sang mga bisita para sa Kapiestahan.
Suno kay Anacan, may nadugang nga isa ka unit sang fastcraft para sa dugang nga isa ka trip sa Iloilo-Bacolod.
Dugang pa, may yara man sang Passenger Assistance Center sa BREDCO port nga magabulig sa mga pasahero nga nagagwa sa Iloilo.
Ginapakamaayo man sini nga wala sang weather disturbance subong sa kadagatan, bangud sa Amihan ukon Northeast Monsoon.
Ginpahayag sini nga prayoridad nila ang kaluwasan sang mga pasahero ilabi na ang mga bata kag tigulang.
Ginalauman man nga magdamo ang mga pribado nga salakyan sa pantalan samtang papuli na ang mga tawo matapos ang selebrasyon.
Ginpanugyan ni Anacan sa mga pasahero nga siguruhon anay ang schedule sang barko antes magkadto sa pantalan.
Magdala sang kinahanglanon nga maintenance nga bulong sa tigulang kag gatas para sa mga may bata, kag mangin updated sa mga pahibalo sang Coast Guard.
