Ginapanugyan sang konsehal sa ciudad sang Bacolod nga masumiter na ang status reports tuhoy sa mga loans sa bulan sang Nobyembre, antes ang natalana nga budget deliberation ukon public hearing para sa 2027 Annual Budget sang ciudad.
Sa interview sang Bombo Radyo Bacolod kay Bacolod City Councilor Wilson “Jun” Gamboa, ang money loan sang Benitez Administration ang yara sa P4.4 billion, samtang masobra P1 billlion naman ang outstanding loan sang Leonardia Administration.
Nagapati ini nga narelease na ang tanan nga loans bangod sa inisyal nga budget proposal, nakita na nila nga P5.8 billion nga loans nga kinahanglan bayaran.
Diri naman nagasulod ang kwestyon sa kun ngaa wala pa natapos ang mga proyekto kag kun kis-a nagaka-untat kun yara naman ang budget.
Suno diri, luyag nila nga makita kun pila ang napagwa nga budget sang finance department kag ang alokasyon sini sa mga proyekto.
Suno kay Gamboa, malakip naman diri ang progress report sang constructions sa mga proyekto nga napondohan sang loan kaangay sang Bacolod Masskara Coliseum kag Museum sa idalom sang Leonardia Administration, kag ang Legislative Building sang Benitez Administration, nga overdue na.
Panindugan ni Gamboa nga indi nagakaigo nga magbayad sang utang ang ciudad nga wala man nahibaluan kun diin nagkadto ang kwarta kag kun ini ang napuslan.
Gani dapat nga masumiter na sa Nobyembre ang report sang Local Finance Committees antes pa ang budget deliberation ukon public hearing.
Una na nga nakasugtan nga suguran na ang deliberasyon sa una nga semana sang Nobyembre, kag mahimo usisaon sa bilog nga bulan.
Samtang mahimo naman maglab-ot sa 2nd reading sa una ukon ikaduha nga semana sang Disyembre.
Paathag ni Gamboa nga ulihi na kun antes na sang 2nd reading ipasa ang dokumento, bangod indi na nila marevise pa kag ang mangin desisyon na lamang amo ang pag-reject ukon pagpasar sang budget.
