Nakibot na lamang si Bacolod City Councilor Em Ang sa natabo nga komosyon sa tunga nanday Councilor Homer Bais kag Congressman Alfredo “Albee” Benitez.
Sa interview sang Bombo Radyo kay Councilor Em Ang, chairperson sang Committee on History, Culture, and Arts, ginpaatahag sini nga nagfile siya sang resolution nga nagarequest sang detailed status report sa mga unfinished city infrastructure projects, lakip na ang Bacolod MassKara Coliseum kag museum-auditorium.
Ini agud mahibaluan ang status, table of completion kag ang gintunaan sang delay sa mga proyekto.
Suno diri, nagsugod ang construction sa duha ka mga proyekto sang Oktubre, 2019.
Gani, kinahanglan suno sa iya mahibaluan kun ngaa wala sa gihapon ini natapos makaligad ang pito na katuig.
Suno sa Konsehal, kompleto sang funding ang proyekto gani nagalibog ang iya ulo kun ngaa wala sa gihapon ini natapos.
Gani suno sa iya, tion na agud mahibaluan sang Sangguniang Panlungsod kun ano ang ila mahimo mabulig kag kun ano ang ila dapat ubrahon.
Ginpaathag sini nga wala sila sang personal nga gina-atake ukon iban nga tuyo kundi mahibaluan lamang kun ano na ang status sang proyekto.
Paathag ni Ang, wala man sang natabo na gamo sa ila pagpatigayon sang Sangguniang Panlungsod session sang Miyerkules.
Suno diri, normal lamang nga may mga gakwestyon nga iban nga miyembro basta may ginapresentar nga resolution.
Dugang pa, trabaho nila naga i-examine ang mga proyekto sang ciudad.
Sa pihak sini, nagalaum ang konsehal nga maresolbar gilayon ang isyu sa tunga nanday Councilor Bais kag Cong. Albee.
