Nakilal-an na ang babayi nga gina-alegar may deperensya sa paminsaron nga nalapakan sang wing van sa Purok Magti-ayon, Brgy. 10, Bacolod City kahapon sang hapon.
Sa interview sang Bombo Radyo Bacolod kay Police Major Elmer Bonilla, Head sang Bacolod Traffic Enforcement Unit, nag-abot sa Bacolod Police Station 2 ang himata sang biktima alas-6:00 kagab-i agud tsekyaron ang bangkay kun ini ang ila himata nga pila ka adlaw na nga wala makapauli.
Ginkumpirmar mismo sang iloy nga ang biktima amo ang iya bata nga si Kristine, 39 anyos, single, residente sa banwa sang San Enrique.
Aminado man ang iloy nga may-ara sang deperensya sa paminsaron ang iya bata, nga pila ka adlaw naman nga nakita sang mga residente sa Brgy 10 nga nagaliyong sa area.
Madumduman nga ini ang naatrasan kag nalapakan gid ang ulo sang wing van nga ginamaneho ni Ardy Daypal, residente sang Sitio Beatingo, Brgy. Old Escalante, Escalante City.
May inisyal naman nga pag-estoryahanay ang pamilya sang biktima kag ang tag-iya sang truck, apang nagahulat pa ang kapulisan kun may-ara sang pag-aregluhanay ukon magapasaka gid sang kaso ang iloy.
