Nagdangat na sa P8.57 billion ang kahalitan kag kapierdihan sa sektor sang agrikultura bangud sa El Niño, santo sa Department of Agriculture (DA).
Base sa assessment sang mga regional office, ang mga kahalitan ang na-record sa Cordillera Administrative Region, Cagayan Valley, Central Luzon, CALABARZON, MIMAROPA, Bicol Region, Western Visayas, Negros Island Region, Central Visayas, Eastern Visayas, Zamboanga Peninsula, Davao Region, SOCCSKSARGEN, kag Caraga.
Apektado ag 288,058 ka mga mangunguma samtang 291,154 ka ektarya naman ang nahalitan.
P5 billion pesos ang na-record nga halit sa mais, kag amo ang may pinakadako nga bahin sa total damage.
P2.95 billion naman ang gin-sufrer sa humay.
Kalakip sa mga naguba amo ang mga lowland vegetables, spices, bean crops, sandiya, saging, kag pinya.
Nagdangat naman sa P37.75 million ang nahalitan sa mga kasapatan partikular na ang baboy, karabaw, pato, manok, kanding, turkey, kag gansa.
Ang mga balor nga nasambit ang ginatun-an pa sang DA.
Naghatag naman ang Agriculture department sang P11.34 billion para sa mga apektado nga mangunguma, lakip diri ang P10.81 billion worth sang mga binhi, fertilizers, soil conditioner, kag iban pa.
Nag-install naman sang mga water pumps sa nagkalain-lain nga bahin sang pungsod.
