Indi magnubo sa 22 ang napatay samtang 24 naman ang pilason matapos mabunggo ang bus sa isa ka cargo truck kahapon, Oktubre 25, sa isa ka highway sa Makaueni, Kenya.
Base sa imbestigasyon sang kapulisan, naggikan sa lubong ang mga pasahero nga sakay sang nasambit nga bus sang matabo ang aksidente.
Suno kay Makaueni County Commissioner Abdullahi Khalif, mahimo madungagan pa ang numero sang mga napatay sa diin padayon pa nga ginabulong sa karon ang mga nasamaran.
Indi pa maathag ang gintunaan sang aksidente apang santo sa kapulisan, posible nga nakaapekto sa aksidente ang speeding kag indi maayo nga kondisyon sang kalsada.
Sang nakaligad nga tatlo lamang ka semana, sa amo man nga highway, nga nagaangot sa ciudad sang Mombasa kag capital nga Nairobi, nagluntad ang isa ka insidente sa diin 17 ang ginbawian sang kabuhi.
Santo sa otoridad, masami nagakatabo ang mga pagbungguanay sa kalsada bangud “accident black spot” ini sang highway.
