Ginpahayag ni Bacolod City Councilor Homer Bais nga panilagan anay sini ang mga ipagwa nga updates tuhoy sa projects nga napondohan sang loans, partikular na sa Legislative Building, samtang ginakonsiderar naman niya nga personal nga magrequest sang special audit gikan sa Commission on Audit.
Sa interview sang Bombo Radyo Bacolod kay Bais, expected na sini nga indi magprosper ang iya resolusyon nga magapanawagan sang COA special audit.
Suno sa konsehal, luyag gid sini nga mapalab-ot anay sa konseho ang iya concerns apang bangod ginbasura na ang iya resolusyon, kag duha lamang sila ni Councilor Wilson “Jun” Gamboa ang nagpabor, hulaton na lamang anay niya ang ipresentar nga updates.
Apang kun wala sang makita nga sabat, may opsyon man ini nga personal nga magrequest sa COA, ukon pwede man nga maderekta sa Office of the Ombudsman.
Sa pihak sini, nakita ni Bais nga kaangay nga may grupo naman nga luyag magrequest sa COA para sa pagpatigayon sang special audit sa kontrobersyal nga proyekto nga kuntani nagamit na sang Enero 2026 santo sa schedule, apang nadelay.
Nahibaluan nga ang Bacolod Legislative Building ang may original budget nga P500 million, apang ini ang napasaka sa P700 million matapos ginreallign ang budget nga para kuntani sa merkado.
Samtang wala naman sini ginsabat kun siya ang nagapabilin gihapon sa mayorya, sa baylo, ginpahayag ni Bais nga sa tunga sang partido, loyalty, kag sworn duty, iya nga tindugan ang iya ginsumpaan nga mandato.
