Ginpasalamatan sang Punong Barangay sang Barangay Handumanan, ciudad sang Bacolod ang tanan nga nagkooperar agud nga mangin matawhay ang pagbisita sang mga himata sa ila nga mga minatay sa Handumanan Public Cemetery sang All Saint’s kag All Souls Day subong nga tuig.
Sa interview sang Bombo Radyo Bacolod kay Punong Barangay Febe Legaspi, antes pa man ang Tigkalalag, naka-meeting na sila upod si Bacolod City Mayor Greg Gasataya, Bacolod City Administrator Atty. Mark Steven Mayo, Philippine National Police, Bacolod Environment Natural Resources Office (BENRO), Bacolod Traffic and Transport Management Department (BTTMD), mga Job Orders kag mismo ang Barangay Officials nga ginapangunahan sini.
Suno kay Legaspi, nanamian siya bangud matalunsay ang pagpatuman sang mga pagsulundan agud nga masiguro ang seguridad sang tanan nga nagabisita sa patyo.
Napabilin man ang katinlo sa patyo bangud may yara sang nagasunod sa paglimpyo.
Ginpahayag sang Punong Barangay nga may mga magagmay nga mga reklamo kaangay sang nakawat nga bulak kag madanlog nga dalan apang ini ang indi na bag-o bangud nagakatabo man ini kada tuig.
Suno diri, sa kabug-usan nangin matawhay ang pagbisita sang mga himata sang nakalubong sa Handumanan Public Cemetery kag ang mga nagabaligya sang bulak ang nabaklan man bisan paano.
Ginpasalamatan sini ang City Government, mga kapulisan, BENRO, JO, BTTMD, Barangay Officials kasubong man ang tanan nga mga nagbisita sa patyo kag nagsunod sang mga pagsulundan.
