Nagdangat sa 2000 ang mga pasahero nga nagpagwa sa Bacolod City samtang 700 naman ang nagapasulod santo sa rekord sang Philippine Coast Guard Sub-station Bacolod, Lunes, Nobyembre 2.
Sa interview sang Bombo Radyo Bacolod kay Lieutenant Junior Grade Zindy Godspeed P. Firmalo, Sub-station Commander, Coast Guard Sub-station Bacolod, nagapadayon ang gwa sulod sang mga pasahero sa pantalan sa ciudad sang Bacolod.
Sa ulihi nga rekord nagdangat na sa 2000 ang outbound passengers samtang 700 naman ang inbound passengers
Suno kay Firmalo, ginalauman pa nila nga magadamo pagid ang mga pasahero nga magabiyahe pasulod kag pagwa sa Bacolod City kag Negros Occidental.
Ginpahayag sini nga wala man sang narekord nga nagcancel sang biyahe nga shipping lines.
Panugyan ni Firmalo sa mga pasahero nga magtalana sang oras sa ila pagbiyahe padulong sa pantalan agud nga makasakay sang temprano.
