Aminado ang Presidente sang Federation of Irrigators’ Association of Central Negros – Bago River Irrigation System, Inc. (FIACN-BRIS) nga may kabudlayan ang mga ordinaryo nga mga mangunguma sa pagbaligya sang ila nga mga humay bangud may yara sang dapat nga sundon nga requirements ang National Food Authority.
Sa interview sang Bombo Radyo Bacolod kay Pedro Limpangog, may kabudlayan ang mga mangunguma bangud nagapangita ang NFA sang 95 percent nga purity sang humay kag moisture content nga 11 tubtob 14 percent moisture content agud nga mabakal ini sa P30 kada kilo.
Suno kay Limpangog, nabudlayan ang mga mangunguma sa paglab-ot sang mga requirements sang NFA bangud kulang sa post harvest facilities kaangay sang dryer kag blower sang humay bangud kalabanan sa karun nga ginagamit sa pag-ani ang rice harvester.
Isa man sa kabudlayan sa mga mangunguma amo ang hauling sang ila mga produkto pakadto sa NFA.
Samtang ginpasalamatan man sini ang Negros Occidental Provincial Government sa pagpanguna ni Governor Eugenio Jose “Bong” Lacson sa pagpatigayon sang mga interbensyon kag pagbulig sa mga mangunguma sa probinsya.
Dugang pa sini ang probinsya ang magahatag man sa asosasyon sang arocera bangud kinahanglanon nila sang labhang agud igatong sa pag-operate sang mechanical dryer nga ginhatag man sang probinsya sa ila asosasyon.
Ginpahayag man sini nga agud nga matuman sang mga mangunguma ang requirements sang NFA dapat mabuligan sila sang gobyerno sa pagbakal sang madamo nga dryer machine kag post harvest facilities.
