Present man ang mga veterans sa ginpatigayon nga 128th commemoration sang Al Cinco de Noviembre ukon Negros Day sa ciudad sang Silay.
Sa interview sang Bombo Radyo Bacolod kay retired Captain Reylan Coronel, presidente sang Silay City 3rd Veteran District, ginapasalamatan nila ang solemn apang masadya nga pagdumdom sang kaisog kag pagpangabudlay sang mga Negrense sa panahon sang gyera.
Sa karun, isa na lamang ang nabilin nga miyembro sang orihinal nga veterans sa World War II nga si Rosita Alba Delos Santos, 89 anyos, asawa sang isa sa nakigbato sa gyera.
Suno kay Coronel, apisar nga wala nagid kaabot sa gyera ang kadam-an sa mga miyembro sang veterans club, ini ang ginabug-usan sang mga retirado nga malawig na nga nangin kabahin sang Philippine Army, Philippine Navy, Philippine Airforce, Philippine Coastguard, kag mga sadto miyembro sang Philippine Constabulary.
Si Coronel ang 37 ka tuig man sa AFP, nga na-assign sa Calinga Apayao.
Para sa iya ang pinaka-historic niya nga eksperyensya amo ang pag-away nila sadto sa masobra isa ka gatos nga communist terrorist, samtang 24 lamang sila nga suldado, apang wala sang may napatay sa ila nga tropa.
Ginapasalamatan niya nga gina-ulikdan tubtob sa subong nga henerasyon ang pagkabaganihan, kaisog, kag kaalam sang mga Negrense sadto nga naghatag sang kahilwayan sa probinsya.
Samtang padayun gihapon ang pag-upod sang nabilin nga asawa sang suldado nga nakigbato sa dumuluong nga Hapon sa veterans club.
Sa interview sang Bombo Radyo Bacolod kay Rosita Alba Delos Santos, 89 anyos, ang iya bana ang nagtaliwan sang 1980.
Suno diri, dako ang ila age gap kag bata pa siya sang natabo ang gyera, apang bangod asawa sang nakigbato sa gyera, siya ang automatic na nga nangin miyembro.
Sila ang may siyam ka mga kabataan, nga ginbuhi niya paagi sa pagpanahi kag pagluto, kag ang gab-i ang ginahimo niya nga adlaw.
Nagapasalamat lamang ini nga mabuot kag wala sang salawayon sa siyam nila ka kabataan.
Mensahe sini sa mga kabataan sa subong nga henerasyon nga mangin masinulundon sa ginikanan.
