Nangin maragtason ang naggwa nga resulta sa Midterm Elections kag ini ang nagdala sang ‘blue wave’ sa US state government.
Ini ang ginkakibot man sang kadam-an ilabi na sa Houston Texas nga ginakabig “Red state” ukon pabor sa Republican, apang subong ang nag-ugyon sa Democrat party.
Sa interview sang Bombo Radyo Bacolod kay Bombo International News Correspondent Noor Moraña, direkta sa Houston, Texas, ginpahayag sini nga sila ang nasurpresa man sa nangin outcome sang eleksyon sa diin ang anay republican state sa sulod sang 30 ka tuig ang ginsakop na sang Democrat party.
Suno diri, nakuha man sang nasambit nga partido ang kadalag-an sa governor’s race sa Texas nga gindumalahan sang Republican sa sulod sang dose ka tuig.
Sa una nga kahigayunan, gin-elehir sang Texas ang ila labing-una nga Hispanic governor.
Ginpahayag ni Moraña nga damo ang nagsaylo sang partido kun sa diin sang una Republican apang subong nga election nagboto para sa Democrat.
Pila sa mga ginalantaw nga rason sang resulta sang botohay amo ang gyera sa Iran, immigration policy, kag iban pa nga polisa ni US President Donald Trump nga madamo ang nagapamatok, suno kay Moraña.
Ginpahayag man sini nga apisar yara sa Democrat ang mayorya, humalin sa Lower house tubtob sa Senado, indi basta-basta ang pagpasar sang mga hagna kag layi sa Senado bangud kinahanglan gihapon sang two thirds nga majority ukon 67 ka mga boto sa diin 54 ka seats lamang ang nakuha sang democratic party.
Kasubong man sa House of Representatives nga nagakinahanglan sang 290 ka majority votes kag 231 lamang ang Democrat.
Suno diri, mahimo man nga gamiton ni Trump ang iya veto power batok sa democrat.
Suno kay Moraña, dako man ang posibilidad nga pasakaan sang impeachment case si Trump apang ginpahayag nga imposible nga ma-impeach ang presidente bangud sa ginakinahanglan nga two-thirds nga boto.
