Indi pa mapat-ud kun lalaki ukon babayi ang kalabera sang tawo nga nasapwan sa Hacienda Gonzaga, Brgy Mansilingan, Bacolod City alas- 8:30 kaina sang aga.
Sa interview sang Bombo Radyo kay PCapt JR Reyes, Officer in Charge sang Bacolod Police Station 7, samtang nagamaneho sang iya motorsiklo ang nakasaksi nga si Mark Jovel Pacheco nga residente sang nasambit nga lugar, nakita sini ang ido nga may ginatangab nga tul-an sa kilid sang dalan.
Gani siya ang napondo kag sang pagtsekyar sini, didto na niya nasapwan ang mga tul-an kag bagol sang tawo nga naglapta sa katubohan.
Suno kay Reyes, ginforward na nila sa Scene of the Crime Operatives (SOCO) sa pagtumod sang identity sang kalabera.
Suno diri, narecover sa area ang isa ka kulintas kag short.
Suno pa kay Reyes, wala man sang may nakapanimaho sang bangkay sa lugar.
Ginapanwagan sini sa mga may himata nga namissing nga makigkoordinar sa kapulisan kag sarang man sila nga makarequest sang DNA testing para sa kumpirmasyon.
