Madinalag-on nga ginpatigayon sang Bombo Radyo Philippines ang Dugong Bombo 2026 “A Little Pain, A Life to Gain,” ang tuigan nga nationwide blood donation drive kaupod ang Bombo Radyo Philippines Foundation, Inc. kag Philippine Red Cross.
Dululungan nga ginpatigayon ang bloodletting activity sa magkatuhay nga bahin sang pungsod sang Sabado, Nobyembre 14, 2026, kun sa diin nakakolekta sang kabug-usan nga 1,964,250 cubic centimeters ukon cc sang dugo gikan sa 4,365 ka madinalag-on nga blood donors sa bug-os nga Pilipinas.
Katumbas ini sang halos 1,964 ka liters, 518 galon ukon malapit sa 10 ka drums sang dugo nga makabulig sa pagdugang sang supply sang blood banks sa nagkalain-lain nga ospital sa pungsod.
Tuman gid ang pagpasalamat sang Bombo Radyo Philippines sa tanan nga madinalag-on nga nagdonar sang dugo, subong man sa mga nagparehistro apang wala nakapadayon bangud wala nakapasar sa kinahanglanon nga medical screenings.
Ginpasalamatan man sang pamunuan ang tanan nila nga kaupod nga mga organisasyon, lokal nga gobyerno, civic kag community organizations, mga boluntaryo kag iban pa nga mga grupo nga naghatag sang suporta agud mangin madinalag-on ang kaangay nga aktibidad.
Ang nakolekta nga dugo ang dako nga bulig agud madugangan ang supply sa blood banks, ilabi na sa tunga sang dalayon nga pagkinahanglan sang mga pasyente nga nagakinahanglan sang blood transfusion kag urgent medical services.
Ginhatagan pagtamod sang Bombo Radyo Philippines nga indi lang blood donation drive ang Dugong Bombo bangud nagapakita ini sang spirit of compassion, generosity, kag pagkabaganihan sa mga Pilipino.
Ang tagsa ka patak sang dugo nga gindonar ang nagahatag sang paglaum kag tsansa nga masalbar ang kabuhi sang mga tawo nga nagakinahanglan sini.
Bilang pagpasalamat, ang mga madinalag-on nga nagdonar sang dugo ang ginhatagan sang pinasahi nga Dugong Bombo T-shirts, hot meals, vitamins, snacks kag refreshment.
Sa tanan nga nagdonar, nagpakigbahin, nagboluntaryo kag nagsuporta sa kampanya, THANK YOU bangud sa inyo nangin madinalag-on ang
Dugong BOMBO 2026.
“DUGONG BOMBO 2026: A LITTLE PAIN, A LIFE TO GAIN.”
BASTA RADYO… BOMBO!
