Opisyal na nga ginbuksan subong nga adlaw ang 19th Negros Island Organic Farmers Festival nga ginpangunahan ni Governor Eugenio Jose “Bong” Lacson.
Ini ang patigayunon sa Negros Occidental Provincial Capitol grounds sumugod subong nga adlaw Nobyembre 17 tubtob 21.// 170 ka mga exhibitors gikan sa nagkalain-lain nga Local Government Unit, Farmer Cooperatives kag Organization ang nagdisplay sang ila mga agricultural organic products.
Sa interview sang Bombo Radyo kay Mary Jane Samillano, Chairman sang Highly Urbanized City Agricultural and Fishery Council (HUCAFC) sa Bacolod City, sila ang kada tuig nga nagapartisipar sa amo nga aktibidad.
May yara sila sang local farmers nga nagaproduce sang process foods kaangay sang ginamos, crispy mushrooms, sinamak, kasag kag iban pa.// Ang mga prutas kag utanon ang gikan sa local farmers sang Barangay Alangilan.
Apisar nga may El Nino, ginpahayag ni Samillano nga indi pa gid tuman ka apektado ang mga mangunguma bangud may yara pa sang pag-ulan sa ciudad sang Bacolod.// Ginapakamaayu man sini nga madamo sang nagabakal sa ila produkto.
Samtang, ginpahayag ni Lian Baris sang AMIA Village Pontevedra Farmers Association, lakip sa ila mga ginabaligya amo ang organic salted egg nga nagabalor P18 kada isa, samtang P13 naman ang fresh egg.
May yara man sila sang pickled nga tambo kag kapayas.
Samtang suno naman kay Jorien Logbionon, job order employee sang ciudad sang Sagay, sila ang nagsugod plastar alas-4:00 kahapon.
Dala man nila ang lainlain nga variety sang bugas, utanon, kag prutas, kasubong man ang Utokon nga pagkaon para sa kabataan…Sa pagbukas sang 19th Negros Island Organic Farmers Festival kalakip man sa mga nagpartisipar ang mga farm schools.
Ang aktibidad ang may tema nga “From Local Roots to Global Impact.”
Sa interview sang Bombo Radyo Bacolod kay Joemer Javier, School Head sang Manghanoy Mang Farm School sa banwa sang La Castellana, may-ara sang 14 ka farm school sa Department of Education division of Negros Occidental nga nagpasakop sa Organic Farm Festival.
Ginadisplay sang Manghanoy Mang Farm School ang pila ka mga organic products nga may nagakaigo nga packaging kag labels, gani ang kalidad ang kaangay na sa mga gina-export nga produkto.
Pila sa mga una nila nga nadisplay ang takway, dagmay, luy-a, red rice kag madamo sang iban pa.
Suno kay Javier, school heads kag mga non-teaching personnel lamang ang ginapahanugutan nga magbantay sa kiosk sang farm schools.
Samtang nagpangagda naman sa mga advocates sang organic agriculture kag mga nagahatag sang dako nga bili sa ila ikaayong lawas ang Teacher 2 sang Cansilayan Farm School sa banwa sang Murcia.
Lakip sa ila ginadisplay nga produkto ang nakapackaging nga organic fertilizer.
Ang produkto ang gikan sa agricultural debris, mga panit ka utan kag prutas, nga makabenepisyo sa tatlo ka properties sang duta nga ginalakipan sang physical, chemical, kag biological.
Ini ang mabakal sa P20 kada kilo nga presyo, nga mas barato kag nature friendly sangsa abono.
May-ara man sila sang mga utanon kag chinese herb…. Samtang, ginkumpirmar sang Provincial Agriculturist sa Negros Oriental nga gamay pa lamang ang natuga nga kahalitan sang El Niño phenomenon sa ila probinsya.
Sa interview sang Bombo Radyo Bacolod kay Emmanuel Caduyac, indi pa tuman ang epekto sang El Niño bangod may mga nagakaeksperyensyahan pa nga mga pag-ulan partikular na sa hapon kag gab-i nga masami mabatyagan sa Southern Negros Oriental.
May mga kahalitan man sa 2,000 hectares nga plantation sang High Value Crops sa Canlaon City, nga indi paman gid tuman ka dako.
Ang mga nakarecord sang damages ang ginalakipan sang Canlaon City, La Libertad, kag Zamboanguita nga naghubas na ang irigasyon.
Suno kay Caduyac, santo sa forecast sa Pebrero 2027 pa ang peak sang dry spill nga makaapekto sa Negros Oriental.
Nagalaom man ini nga indi gid tuman ka lala ang mangin epekto sang Super El Niño sa sektor sang agrikultura.
Sa pihak sini, nagahulag naman ang Task Force El Niño kag nagpanghatag naman ang mga ini sang binhi sang variety sang mais nga mas madasig mag-mature kag sarang na nga maharvest sa tatlo tubtob apat ka bulan.
Samtang lakip man sa ila intervention ang pagtukod sang mga solar powered water pump para sa mga mangunguma.
Sa Negros Oriental, yara sa 14,000 hectares ang maisan, 19,000 hectares ang humayan, samtang 90,000 hectares naman ang katubuhan.
Si Caduyac amo ang nagpamuno sa mga taga-Negros Oriental nga nakigbahin sa 19th Negros Island Region Farmers Festival sa Negros Occidental Provincial Capitol grounds.












