Transport Group, nanawagan nga pasakaan sang kaso ang mga fuel companies nga wala nagasunod sa ginapatuman nga fuel price adjustments
-- ADVERTISEMENT --

Ginapanawagan sang Sentrong Samahan ng mga Tsuper at Operators – Negros nga dapat pasakaan sang kaso ang mga oil companies nga wala nagasunod sa ginpatuman nga fuel price adjustments.

Sa interview sang Bombo Radyo kay SSTON Secretary General Junjun Asis, ginapakamaayo sini ang asud-asud nga dako nga pagnubo sa presyo sang produktong petrolyo.

Apang, ginakahangawa man ni Asis ang posible nga hinali nga pagsaka sang presyo sa masunod nga mga semana.

Dugang pa sini, dapat i-monitor gid sang ciudad ang mga gasolinahan bangud kun may yara sang rollback, tatlo pa ka adlaw antes nagapatuman sang fuel price adjustments ang pila ka mga gasolinahan.

Apang kun may pagsaka sa presyo, alas-3:00 pa lang sa kaagahon sila ang nagapasaka na.

-- ADVERTISEMENT --

Suno kay Asis, sang nagligad nga P16 kada litro nga pagsaka sa presyo sang gasolina, P10 lamang ang ginubo sa pila ka mga gasolinahan sa ciudad sang Bacolod.

Pahayag sini, kun sa ciudad pa lang istrikto na ang monitoring, obligado na ang mga oil companies nga magpatuman kag indi na kinahanglan nga ipasa pa sa national.

Dugang pa ni Asis, naanad na lamang mga oil company nga mamintaha bangud wala sang penalidad.

Nagalaum man ini nga padayun na ang pagnubo sang presyo sang produktong petrolyo agud mapanubo man ang pletehan.

Ginpahayag sang SSTON Secretary General nga sila ang padayon lang gid sa pagtrabaho kag pagpalab-ot sa gobyerno sa ila mga panawagan sa mga nagapamintaha nga mga oil company.