Nagpadulong sa City Mall Mandalagan para sa Dugong Bombo 2019 ang isa ka pamilya nagikan sa ciudad sang Bago nagligad nga Sabado agud magdonar sang dugo.
Bilog nga pamilya Caprestante ang nagkadto apang sa lima sa ila, apat lang ang nangin successful blood donors.
Sa interview sa amay nga si Rizalde Caprestante, isa ka seafarer, apat lang sila sang iya mga kabataan ang natigayon nga makuhaan sang dugo bangud manubo ang hemoglobin sang iya asawa.
Suno diri, ini na ang ika-apat niya nga tion nga magdonate sang dugo sa tuigan nga bloodletting activity sang Bombo Radyo.
Ini naman ang ika-apat nga kahigayunan nga magdonate sang dugo sang iya kamagulangan kag ika-duha nga bata.
Samtang, ikaduha naman ini nga tion para sa iya agot.
Ini man kuntani ang ikaduha nga bes nga magpakuha sang iya misis.
Suno kay Caprestante, naandan na niya nga magpakuha sang dugo kada Nobyembre kag nagapasalamat man siya nga nagakatuon ang iya bakasyon sa amo man nga bulan.
Nangin panata naman sang mag-amay gikan sa banwa sang Murcia ang magpakuha sang dugo sa tuigan nga bloodletting activity sang Bombo Radyo Philippines.
Suno kay Reynaldo Diosa Sr., 51-anyos sang Barangay Iglaw-an, Murcia, luyag niya nga magpakuha sang dugo bangud nakahibalo siya nga madamo sang nagakinahanglan sini ilabi pa subong nga madamo sang balatian nga nagatuhaw.
Dugang pa sini, indi lamang siya makabulig sa iban kundi makabulig man ang pagdonar niya sang dugo sa iya mismo nga ikaayong-lawas.
Samtang, nagpadulong gid sa ciudad sang Bacolod nagikan sa Zamboanga City si Reynaldo Diosa Jr., 25-anyos agud updan ang iya amay nga magpakuha sang dugo.
Suno diri, sang nagligad nga Miyerkules siya nagpauli kag mabalik naman sa Zamboanga subong nga adlaw.
Ini naman ang ika-duha na nga tion nga nag-donate sang dugo ang mag-amay nga Diosa kag ginpangako sang mga ini nga mangin panata na nila nga magpakuha sang dugo kada tuig.
Sa pihak nga bahin, dungan nga nagdonar sang dugo ang magnobyohanay sa Dugong Bombo 2019 sa City Mall Mandalagan sang Sabado.
Sa interview sang Bombo Radyo Bacolod kay Eduardo Gador kag Mitch Ocomus, ginpahayag sang mga ini nga madugay na sila nga nagadonar sang dugo apang ini ang una nga beses nga nagdonate sila sa Dugong Bombo.
Suno kay Gador, madugay na nila nga plano ang magdonate sa Dugong Bombo kag suno sa iya, nagmag-an ang iya nga pamatyagan matapos makuhaan sang dugo bangud nahibaluan niya nga maislan na naman sang bag-o ang iya nga dugo kag makapaayo ini sa iya nga lawas.
Samtang, nagakalipay man si Ocomus bangud suno sa iya, sa pagdonate sang dugo, mamonitor na ang ila nga ikaayong-lawas, makabulig pa sila sa iban.
Nagpasalig man ini nga magadonar liwat sa Dugong Bombo kaupod ang iya nga nobyo sa masunod nga mga tuig.
Nagpangagda man si Ocomus sa mga tagpalamati nga magtesting man sa pagdonar sang dugo bangud madamo ini sang benepisyo.
