Nangin madinalag-on ang ginpatigayon nga Trillion Peso March sa ciudad sang Bacolod kahapon, Nobyembre 30.
Ini ang gintambungan sang madamo nga mga pumuluyo nagikan sa nagkalain-lain nga sector.
Ang aktibidad ang ginpatigayon kasunod sang ika-162 nga kaadlawan ni Andres Bonifacio.
Nagmartsa ang mga partisipante gikan sa Nothern Bacolod halin sa South Capitol Road samtang nag-umpisa naman sa Lupit church ang mga gikan sa Southern Bacolod padulong sa Bacolod City Public Plaza.
May ginpatuman man nga mga rerouting scheme sa mga dalanon kahapon bangud sa ginpatigayon nga pagmartsa.
Nagpadulong naman sa Bacolod City agud nga makigbahin sa aktibidad si Kabataan Partylist Representative Atty. Renee Co.
Sa interview sang Bombo Radyo Bacolod sa Kongresista, ginpahayag sini nga ang ginasinggitan sa karun amo nga mapasabat ang tanan nga may kaangtanan sa korapsyon.
Suno diri, tubtob sa karun indi transparent ang ginahimo nga imbestigasyon sang Independent Commission for Infrastructure (ICI) angot sa anomalous flood control project.
Panindugan sini nga indi nagakaigo nga ginaimbestigaran lamang ang natabo nga korapsyon kundi dapat may yara gid sang manabat.
Suno pa kay Co, ang budget nga kuntani nagakadapat para sa edukasyon ang haluson pa nga mahatag, apang bilyon-bilyon ang kantidad nga nakawat sa kaban sang gobyerno.
Indi pa nila mahambal sa karun nga sila ang madinalag-on na sa pagdeny sang International Criminal Court sa interim release para kay Former President Rodrigo Duterte, sa baylo ini ang makabig lamang nila nga kadalag-an kun mapamatbatan nga guilty ang anay presidente sa Crimes against Humanity.
