Ginpasalamatan sang board member sang Third District sang Negros Occidental ang mga pumuluyo sang probinsya sang Negros Occidental ini matapos nga nalakip ang Abang Lingkod partylist sa mga nagdaog nga partylist, kun sa diin siya ang first nominee.
Nahibaluan nga nalakip sa mga winning partylist ang Abang Lingkod sa ginpatigayon nga pagproklamar sang 52 ka mga partylist nga nangin madinalag-on sa ginpatigayon nga 2025 midterm elections tinalikdan nga Mayo 12.
Ang nasambit nga proklamasyon ang ginhiwat sa Manila Hotel kahapon sang hapon Mayo 19, 2025.
Madinalag-on nga nakakuha sang 1 seat sa House of Representatives ang Abang Lingkod sa pagpanguna ni anay Negros Occidental Third District Board Member Manuel Frederick “ManMan” Ko nga nakakuha sang 274,735 nga boto tinalikdan nga piniliay.
Sa interview sang Bombo Radyo Bacolod kay Congressman Elect Manuel Frederick “Manman” Ko, nagapasalamat ini sa mga Negrosanon nga nagboto agud nga mangin isa sa mga nagdaog nga partylist ang Abang Lingkod.
Suno kay Manman Ko dako ang pagpasalamat sini nga nakasulod apisar nga probinsya lamang sang Negros Occidental ang ginlibot agud nga kampanyahan kag wala na sang iban.
Nagpasalig man ini nga liwat pagatutukan ang mga prayoridad sa mga mangingisda kag mangunguma sa tion nga ini ang magpungko.
Napanghitso naman sini ang mga gamit sa iya opisina bilang board member sang 3rd District agud nga paghalin sini nasiguro nga liquidated ang tanan.
