Ginaathag ni Abang Lingkod Representative Joseph Stephen Paduano nga indi privatization ang sa tunga sang Central Negros Electric Cooperative kag More Power kundi Joint Venture Agreement.
Sa interview sang Bombo Radyo kay Paduano, tuig 2011 sang nag-apply ang CENECO sang capital expenditure nga P12 billion apang indi ini maaprubrahan sang Energy Regulatory Commission bangud may loan ang electric cooperative nga P800 million.
Suno kay Paduano, paano mabayaran sang CENECO ang loan kun kada bulan, sila ang nagapanabon sang P20 million tubtob P25 million sa systems loss.
Kun wala sang capex, wala naman sang katapusan ang madugay na nga power outages kag mga problema sang CENECO apisar nga makapila ka beses pa nga mag-ilis sang board of directors.
Suno diri, indi ailing electric cooperative ang CENECO kundi dying electric cooperative kag ginsalo lamang sang bag-o nga mga BODs ang problema sa pinansyal kag serbisyo sini.
Suno sa iya, ang solusyon lamang diri amu nga makakuha sang capital paagi sa loan ukon pagsulod sa public-private-partnership.
Suno sa kongresista, ang assurance sang JVA amu nga may yara sang 30 percent nga magabalik sa CENECO bangud ini ang igamanage sang board of directors samtang 70 percent naman ang bayaran nga property kag asset sang More Power.
Dugang pa sini nga ang JVA ang indi privatization kundi isa ka joint management.
Iya ginarespeto ang mga nagapamatok sa JVA apang ginakwestiyon sini kun ano ang maayo nga alternatibo sa pagsolbar sang problema pinansyal bangud indi man makasolbar diri ang pagpahalin kay Acting General Manager Atty. Arnel Lapore kag mga BOD.
Suno sa iya, kun indi masolbar ang problema sang electric cooperative kag magapabilin ang indi maayo nga sitwasyon kag serbisyo, sa tuig 2025 ukon 2030, indi maaprubahan ang ila renewal para sa franchise kag matabo ang matuod-tuod nga privatization kun kuhaon sang pribado nga mga kooperasyon ang lugar sang CENECO bangud sa karun, madamo ang nagapabutyag sang interest diri.
Nagpasalig man ini nga iya himuon ang tanan agud masigurado nga indi madehado ang mga empleyado kag sa bahin naman sang pagtaas sang electricity rate, ang ERC ang magadesisyon kun sila ang magapahanugot sini.
