Nagapanawagan ang presidente sang Association of the Barangay Captains sang Bacolod sa mga pumuluyo sang kooperasyon agud nga mapanubo kag matapna ang nagaduging nga kaso sang dengue sa syudad.
Sa interview sang Bombo Radyo Bacolod kay Councilor Lady Gles Gonzales Pallen, antes paman ang panawagan sang city government sa tion nga magsulod ang tig-ululan, practice na sang mga punong barangays ang pagkampanya batok sa dengue paagi sa padayon nga education information campaign.
Ini agud nga mahatagan sang nagakaigo nga ihibalo ang mga pumuluyo angot sa dengue.
Nagapatigayon man sila sang clean-up drive apang indi man bilog nga barangay ang matinluan gani nagapatigayon man sila sang information drive agud nga ang mga pumuluyo ang mahatagan sang nagakaigo nga ihibalo angot sa dengue agud magbulig man sa barangay sa pagpaninlo kag sa pagtapna sang nagaduging nga balatian.
Suno kay Pallen, nagabutang man ang mga ini sang chemical nga larvicide nga ginhatag sang city health office sa mga stagnant waters sa barangay agud nga indi na mapangitlugan sang lamok nga may dala sang makamamatay nga dengue.
Nagapatigayon man ang barangay sang fogging apang aminado man si Pallen nga indi man malikop ang bilog nga barangay.
Suno diri, ang pinaka-importante sa karun ang awareness kag education campaign.
Nagpanawagan ini sa mga pumuluyo sa syudad ang Bacolod nga maghimo man sang ila bahin agud malikawan ang dengue.
Sa data sang City Health Office, ang mga dalagko nga mga barangay sa syudad sang Bacolod ang may yara sang madamo nga kaso sang dengue.
Ini ang ginalakipan sang Barangay Mansilingan 37; Estefania nga may 33; Tangub nga may 32; Taculing nga may 29; Sincang nga may 26; Sum-ag 25; Alijis kag Villamonte nga may tag 24 kaso sang dengue; Mandalagan kag Handumanan nga may tag 19; Granada kag Cabug nga may 17 samtang ang Felisa nga may napulo ka kaso sang dengue.
Ang syudad sang Bacolod ang may yara na sang kabug-usan nga kaso sang dengue nga 393 kag pito diri ang ginbawian sang kabuhi bangud sa balatian.
Ini nga figure ang 216.9 percent nga mas mataas komparar sa data sang tinalikdan nga tuig nga may yara lamang sang 124 dengue cases nga may duha ka nagkalamatay bangud sa balatian.
Ang dengue ang wala sang ginapili nga edad ini ang ginalakipan sang isa ka bulan tubtob 86 anyos.
