Gin-elehir bilang opisyal nga Chief Minister sang Bangsamoro Autonomous Region in Muslim Mindanao (BARMM) si Abdulraof “Sammy Gambar” Macacua matapos makakuha sang 51 ka boto sa ginpatigayon nga eleksyon sa parlyamento kahapon sang Biyernes, Oktubre 30.
Ang maragtason nga eleksyon ang nagtapos sa pito ka tuig nga transition governance, nga nagmarka sa pormal nga pagsaylo naggikan sa interim authority, ukon ang Bangsamoro Transition Authority (BTA), ini ang nangin isa ka regular nga gobyerno nga ginpili sang mga tawo paagi sa demokratiko nga proseso santo sa Bangsamoro Organic Law (BOL) ukon Republic Act No. 11054.
Ang Bangsamoro Organic Law, nga ginratipika sang 2019, ang nagtukod sa BARMM bilang bunga sang mga dekada nga peace negotiations sa tunga sang gobyerno kag sang Moro Islamic Liberation Front (MILF), nga tuyo nga maghatag sang mas malapad nga otonomiya kag kaugalingon nga desisyon para sa pumuluyo sang Bangsamoro.
Ginpierde ni Macacua sang Bangsamoro Federalist Party (BFP) si former interim chief minister Ahod “Al Haj Murad” Ebrahim nga nakakuha lamang sang 27 ka boto naggikan sa 80-member Bangsamoro Parliament.
Si Macacua ang anay chief of staff sang Bangsamoro Islamic Armed Forces (BIAF) sang Moro Islamic Liberation Front (MILF), kag tiglawas sang 3rd parliamentary district sang Maguindanao del Norte, nagserbe man ini nga interim chief minister kag acting provincial governor.
Nagtambong sa inagurasyon ang pila ka mga opisyal sang national government, mga gobernador, peace advocates, kag mga foreign diplomats agud saksihan ang pormal nga pagpungko sang mga regular nga miyembro sang parlyamento.
