May pagbag-o nga ipatuman ang Simbahang Katoliko sa Ash Wednesday ukon Miyerkules de Badles subong nga tuig bangud sa COVID pandemic.
Sa interview sang Bombo Radyo kay Msgr. Felix Pasquin sang Our Lady of Candles Parish Church, indi na pagbas-on sang bendita ang abo kundi pangamuyuan nalang ini kag bendisyunan kag ibubod sa alimpudwan sang tumuluo.
Sa gihapon, magalinya ang mga tumuluo suno kay Pasquin apang magaobserbar sang social distancing.
Sa altar pa lang suno kay Pasquin, magahambal na ang pari nga “dumduma, tawo, nga ikaw yab-ok kag sa yab-ok ikaw magabalik” ukon “talikdi ang sala kag magtuo sa maayong balita”.
Bangud sa pandemic, aminado man si Pasquin nga madamo nga pamilya ang indi makakadto sa simbahan gani sarang gid nga makahimo sang Ash Wednesday ceremony sa sulod mismo sang balay bangud isa man ini ka domestic church.
Kun may lukay nga nabilin sang tinalikdan nga Domingo de Ramos suno kay Pasquin, sarang ini nga masunog sang pamilya kag pangamuyuan kag sarang mabubod sang amay sa ulo sang mga katapo sang balay.
Suno kay Pasquin, importante sa tion sang Semana Santa ang espiritu sang paghinulsol, pagpenetensya kag pagpalapit sa Mahal nga Makaako bangud sa iya lamang ang kaluwasan.
