Ginpahayag sang konsehal kag abogado sa ciudad sang Bacolod nga nagahina ang pag-apresyar sang EDSA People Power revolution sa karun nga henerasyon bangod sa wala nagid maayo matudlo sa mga histpry subjects sa eskwelahan.
Sa interview sang Bombo Radyo Bacolod kay Councilor Atty. Renecito Novero, 31 anyos ini sang natabo ang EDSA People Power revolution sang Pebrero 25, 1986 samtang siya ang na-elect naman bilang konsehal sa edad nga 33 anyos.
Indi mahangpan ni Novero kun ngaa madamo sang wala na nagahatag sang bili sa maragtason nga hitabo nga nagapakita sang gahom sang pumuluyo batok sa ginapatihan sang kadam-an sadto nga oppresive kag corrupt nga pagdumalahan.
Aminado ini nga ang ginalauman nga matapos ang rebolusyon, madula na ang ginareklamo nga kalainan sa panahon ni late President Ferdinand Edralin Marcos Sr, apang sa baylo ini ang naduplicate ukon ginpasobrahan pa sang mga nagsunod nga namuno sa pungsod.
Sa pihak sini, gindayaw naman ni Novero ang pamunuan ni late President Corazon “Cory” Aquino bangod sa sense of nationalism.
Apang ginakasubo sang abogado nga sa karun, ang ginasimba-simba sang mga tawo amo ang mga pangalan ukon pamilya nga nagtuga sang kalainan sa pungsod samtang nakalimtan naman ang mga naghatag sang hamili nga serbisyo.
Suno diri, daw kaangay naman nga ginahatagan pahanugot ang mga pagangawat kag kurapsyon sang mga public officials.
Isa sa factor nga ginalantaw sini nga wala na ma-apresyar sang subong nga henerasyon ang EDSA People Power revolution ang bangod sa kakulangan sa pagtudlo sa mga history subjects sa elementarya bisan pa sa kolehiyo.
Bangod sa kakulang sang paathag, indi mabatyagan sang mga bag-ong tubo ang sentimiyento kag motibasyon sa likod sang rebolusyon nga naghatag sang demokrasya sa mga Pilipino.
Sa pihak nga bahin, nahangpan man sini kun ngaa gindeklarar sang karun nga administrasyon ang Pebrero 25 bilang Special Working Day.
Ini bangod kun personal kag psychological nga rasun ang basihan, makabig insulto sa Pamilya Marcos ang paghanduraw.
Gani kun ini ang updan ni President Ferdinand “Bongbong” Marcos, kaangay lamang nga ginavalidate ukon ginabatun nila nga nagakadapat ang ginhimo nga rebolusyon batok sa iya amay.
