Ginkumpirmar sang director sang Bacolod City Police Office (BCPO) nga nalakip ang isa ka abogado kag isa ka miyembro sang Highway Patrol Group sa apat ka mga pangalan nga nakasulat sa listahan nga nasapwan upod ang duha ka tiil nga ginbilin sa kilid sang isa ka commercial establishment sa CL Montelibano Avenue, Barangay Villamonte, Bacolod City sang Miyerkules sang kaagahon.
Sa interview sang Bombo Radyo kay Police Col. Thomas Joseph Martir, ginmanduan sini ang Bacolod Police Station 4 nga magpatigayon sang intensified investigation kag makig-angot sa mga persona nga nalakip sa listahan.
Suno kay Martir, ginpanginwala sang mga persona nga yara sa listahan ang alegasyon sa papel nga sila ang smuggler kag wala ang mga ini involvement.
Suno diri, handa sila magcooperate sa police sa pagpatigayon sang imbestigasyon.
May mga ideya naman ang mga ini kun sin-o ang posible nga may kahimuan sini.
Ginalantaw sang BCPO director nga indi isolated ang ini nga kaso kag posible pagpamahog ang motibo.
Nagpanugyan naman ini sa mga Bacolodnon nga indi magpakulba ilabi na ang mga nagasunod sa layi kag wala kaangtanan sa illegal nga mga aktibidad.
