Aminado ang abogado nga ang ginakahadlukan ni Pastor Apollo Quiboloy amo ang korte sa America kag ini diri sa Pilipinas.
Sa interview sang Bombo Radyo Bacolod kay Atty Jomax Ortiz, nakahibalo ang mga abogado ni Quiboloy nga siya ang mabudlayan sa pag-atubang sa Senate Hearing sadto gani naghangkat ini nga siya ang maga-atubang lamang sa korte.
Apang sang nagpagwa na sang warrant of arrest ang korte, ang pastor ang nagpanago kag nagdangat pa sa masobra duha ka semana antes nagsungka.
Paathag sang abogado nga lima tubtob napulo ka adlaw, masuguran na ang arraignment sang mga kaso kag si Quiboloy ang umpisa naman nga magatiyog-tiyog sa nanarisari nga korte kun sa diin ginfile ang mga kaso nga sexual abuse, child abuse kag human trafficking.
Magluwas sa kaso sa Pilipinas, aminado si Ortiz nga ang ginakahadlok sang pastor amo ang ma-extradite sa Estados Unidos.
Pamatuod sini ang pahayag sang kampo ni Quiboloy antes paman nagsungka, nga ang raid sa Kingdom of Jesus Christ compound ang plano sang America.
Yara naman sa kamot sang Presidente kun batunon ang request para sa extradition.
Aminado si Ortiz nga kun magrequest sang extradition ang US, mabutang sa alang-alang si President Ferdinand ‘Bongbong’ Marcos Jr. kun indi ini batunon, bangod yara ang risgo nga indi naman magsuporta ang America sa issue sa West Philippine Sea.
Sa karun si Quiboloy ang ma-atubang anay sa tatlo ka seryoso nga kaso nga lunsay wala sang bail.
Sa sistema sa Pilipinas, ginalantaw sang abogado nga magadangat pa sang indi magnubo lima ka tuig ang kada kaso antes makapagwa sang sentensya.
Sa pihak sini, nagapati si Ortiz nga mahimo wala na sang puder ang Senado sa pagpatigayon sang Senate Hearing bangod ang mga mabug-at nga criminal cases ang talakayon na sa korte.
