Nagapati ang isa ka abogado nga wala sang plano si Negros Oriental 3rd District Rep. Arnie Teves nga magbalik sa pungsod nga apisar tapos na ang travel authority sini sang Marso 9, santo sa kumpirmasyon sang Kamara de Representantes.
Sa interview sang Bombo Radyo kay Atty. Jomax Ortiz, para sa iya ginahulat pa sang congressman nga magtawhay ang sitwasyon antes ang pagbalik diri sa pungsod, ilabi na nga ginkasuhan ini sang 3 counts of murder angot sa pagpamatay sa Negros Oriental sang tuig 2019 kag nakuhaan pa gid ini sang granada, mga armas kag mga bala sang ginraid sang CIDG ang ila nga balay sa Basay kag Bayawan City.
Aminado man ini nga may mabakod nga abogado si Teves, nga ini man ang abogado ni Pastor Apollo Quiboloy nga tubtob sa karun yara sa luwas sang pungsod apisar nga may pagaatubangon ini nga kaso.
Suno kay Ortiz, dako ang posibilidad nga indi na ma-issuehan sang passport kag visa ang congressman, kag posible pa nga posasan ini sa gilayon nga magtapak sa pungsod kun may yara na sang warrant of arrest.
Ginklaro man sini nga ang duha ka search warrant sa pag-raid sa propiedad ni Teves ang bangod sa kaso sa pagpatay sang tuig 2019.
Bangud sa mga kaso nga ginaatubang ni Teves, nagapati si Ortiz nga magakadto ini sa mga pungsod nga sarang siya makapangayo sang asylum ukon wala sang extradition treaty sa Pilipinas.
Kun magtinir naman ini sa pungsod nga may extradition treaty sa Pilipinas, ini ang iga-extradite sa pungsod agud nga maatubang sini ang trial sa iya nga kaso.
