Personal nga nagapamatok ang isa ka abugado sa syudad sang Bacolod sa pagpakuha sang selfie sang isa ka telecommunications company sa tion nga magparehistro sang sim card.
Sa interview sang Bombo Radyo Bacolod kay Atty. Jomax Ortiz, wala nakabutang sa implementing rules and regulation sang sim card registration law ang pagkuha sang selfie sa tion nga magparehistro sang sim card.
Suno kay Ortiz, indi man necessidad ang pagkuha sang selfie bangud wala man ini nabutang sa IRR sang layi.
Ginpahayag man sini nga 107 ka pungsod ang nagapractice sang sim card registration kag ang Pilipinas nalang ang wala, gani mahimo nga gindihon kag ginpasar sang legislators sa Pilipinas ang layi sang sim card registration sa paglantaw nga ini ang makatapna sang mga cyber crimes kag iban pa nga katuntuhan nga ginahimo gamit ang sim cards.
Nagapati man ini nga ang layi indi perpekto bangud wala sang perpekto nga layi.
Suno kay Ortiz, wala man sang nagpasaka sang kaso sa korte suprema nga nagaquestion sang constitutionality sang layi gani dapat ini nga sundon bangud wala sang mas labaw sa layi bisan ano pa ang estado sa pagpangabuhi sa sosyodad.
