Nagapati ang isa ka abogado sa Bacolod nga dapat indi pagkalimtan kag handurawon ang maragtason nga EDSA People Power Revolution apang indi man dapat magpabilin sa nakaligad kag magmove forward.
Sa interview sang Bombo Radyo kay Atty. Jomax Ortiz, 37 ka tuig na ang nakaligad, sang Pebrero 25, 1986, ginhanduraw sini nga siya ang manug-graduate na sa kurso nga Law sa University of Negros Occidental-Recoletos kag tanan nga mga law students ang naghinugyaw sa kalipay.
Suno sa iya, kun sa Bacolod lamang ginhiwat ang EDSA, nakigbahin na ang mga law students.
Suno diri, isa ini ka maragtason nga hitabo bangud sa labing una nga kahigayunan, may natigayon nga isa ka peaceful revolution sa bilog nga Asia.
Ini ang nangin modelo man sa iban pungsod bangud sang 1989, may ginpatigayon man nga People Power sa China.
Suno kay Ortiz, nangin tuman kalinong ang EDSA People Power Revolution bangud wala sang maskin isa nga gindala sa ospital ukon nagkalasamaran.
Ginakalipay naman sini nga apisar nga indi maayo nga handurawan para sa pamilya Marcos ang natabo, gindeklarar sa gihapon ni President Ferdinand “Bongbong” Marcos Jr. nga holiday ang Pebrero 24, Biyernes kag ini ang nagapakita lamang nga siya ang nakamove-on na.
Suno diri, ang People Revolution ang nagsugod sang 1983 pa lamang sang gin-assassinate si former Senator Benigno S. Aquino Jr. kag ini ang nagcommemorate lamang sang 1986 pinaagi sa EDSA People Power.
Nagapati ini nga dapat magkabuhi sa present apang indi man pwede nga lipatan na lamang ang nakaligad.
Suno sa iya, ini ang dapat mangin leksyon nga indi na pagpahanugutan nga may diktador pa nga magpamuno sa pungsod nga indi magpanaog sa pwesto kag ginliwat ang Konstitusyon.
Gani dapat mangin magpanilag kag mangin vigilante bilang mga pumuluyo sang Pilipinas tuhoy sa ginaduso sa karun nga pagliwat sang 1987 Constitution.
Apisar nga dapat magpadayon sa pagpangabuhi, para kay Ortiz, wala nagakambyo ang significance kag importansya sang People Power.
