Nagakomporme ang abogado sa Bacolod City sa pagsaylo sang kaso nga sayluhon ang ginpasaka nga kaso may kaangtanan sa pagpatay kay Negros Oriental Governor Roel Degamo sa Manila Regional Trial Court.
Sa interview sang Bombo Radyo kay Atty. Jomax Ortiz, basta high profile case, ginasaylo gid ang venue agud makahatag sang ligwa sa hearing kag indi mabutang sa delikado ang kabuhi sang tawo.
Suno kay Ortiz, may gintukod man nga special panel sang prosecutors para sa high profile cases.
Suno sa iya, ang Pamplona massacre ang komplikado kag indi simple nga kaso bangud mga high profile officials ang imbolbado.
Suno diri, masami nga nagapabor ang Korte Suprema kun may yara sang request ang Department of Justice nga may panel sang prosecutors kag itransfer ang venue kaangay sang natabo sa Maguindanao Massacre agud malikawan ang partiality kag indi maimpluwensyahan sang maskin sin-o man.
Suno kay Ortiz, indi basta-basta ang kaso batok kay Negros Oriental Third District Representative Arnie Teves bangud sa search warrant palang, madamo na sang complexity.
Dugang pa sini nga bangud sa kakomplikado sang kaso kag kun mapasaka gid man sa Korte Suprema, posible nga magadangat sa napulo tubtob 15 ka tuig antes ini matapos.
Apang posible nga ini ang mapadasig bangud may yara sang interest ang gobyerno diri.
Nagapati naman ini nga indi anay magpauli si Teves tubtob nga makasigurado ini nga siya ang makakuha sang piyansa.
