“Power Tripping” ang tawag sang abogado sa ginhimo sang retired PNP General nga pagfile sang kaso batok sa iya kliyente sa tungang gab-i para lamang sa makabig petty crime.
Ini kasunod sang aksidente nga pagkabunggo sang big bike ni retired Police Brig Gen Lope Ma U Lim sa drum truck nga ginadrive sang iya kliyente nga si Romer Estrada, 51 anyos, bangod ang motorsiklo ang nagadalagan sa pihak na nga lane.
Sa interview sang Bombo Radyo Bacolod kay Atty. Ariel Caldit Jr., ginkadtuan niya ang kliyente sa Bacolod Police Station 7 matapos ginpahibalo sang boss sini sa kumpanya sa natabo nga insidente.
Suno diri, may initial settlement na sila sang adlaw kag ginpasalig naman sila nga indi na magpasaka sang kaso.
Naghulat ang iya kliyente nga matapos ang 12 hours reglementary period, kag siya nga abogado ang nag-una na pauli.
Apang siya ang gincontact pasado alas-10:00 sang gab-i nga pasakaan sang kaso ang truck driver.
Dalidali man ini nga nagbalik, samtang ginsakay ang iya kliyente sa pickup agud dal-on sa Hall of Justice nga wala man lang sila ginapahibalo, kag siya pa mismo ang nag-insist nga makaupod sa salakyan.
Ini man mahambal sa iya sang pulis kun ano ang charges batok sa iya kliyente.
Suno kay Caldit, apisar nga legal, karun lang ini nakakita nga nagpadulong gid sa Hall of Justice ang piskal para sa pagproseso sang kaso, dugang pa nga para lamang sa petty crime nga “Reckless Imprudence Resulting to Physical Injury and Damage to Property.”
Pahayag sini, bisan mga serious crimes ang masami ginapahulat pa sa kasunod nga adlaw kun lapaw na sa office hours.
Una nga gin-estorya sang prosecutor ang retired-PNP general, kag witness antes ginpatawag ang iya kliyente.
Suno kay Caldit, ginpapili ini sang prosecutor kun inquest proceedings ukon magrekta na sa korte ukon maglabay sa preliminary investigation.
Panindugan sini nga wala sang sala ang iya kliyente gani wala rasun nga batunon ang inquest proceedings, sa baylo sa preliminary investigation sila ang makasumiter pa sang counter affidavit sa sulod sang napulo ka adlaw.
Panindugan sini nga yara sa husto nga lane ang iya kliyente, sa baylo ang retired PNP general ang yara sa opposite lane.
Suno diri, maathag nga nagapower tripping si Lim.
Dugang pa ni Caldit nga nagapangayo ini sang settlement fee nga P500,000 para sa naguba nga ubox sang big bike.
Panindugan ni Caldit nga sobra-sobra ang ginapangayo kag sa paglantaw sini yara lamang sa P20,000 tubtob P50,000 ang balor sang damage.
Natapos ang filing sang kaso, pasado ala-1:30 na sang kaagahon.
