Ginalantaw ni Bacolod City Councilor Renecito Novero nga halog ang ebidensya batok kay Negros Oriental 3rd District Rep. Arnie Teves nga siya ang mastermind sa Degamo assassination kun wala ini nakita sang mga nagpatay sa gobernador.
Una diri, ginpahayag sang isa ka suspetsado nga gintago sila sa safehouse ni Congressman Teves apang wala niya nakita ang kongresista.
Sa interview sang Bombo Radyo kay Novero, kun may nagatudlo kay Teves nga siya ang mastermind, isa ini ka mabakod nga ebidensya bangud ang nagatudlo ang nag-ako nga ginhimo niya ang krimen bangud siya ang ginsugo ni Teves.
Ang pagtudlo sang suspect ang ginatawag nga declaration against self interest nga makabig nga very strong evidence nga laban-laban nga patihan sang korte.
Kun wala sang first name sang tawo nga gintudlo, ini ang igapaverify sa nagtudlo paagi sa picture ukon tingog.
Ang verification sang identity ang sarang na nga mahimo sa prosecutor kag indi pa sa korte bangud diri gina-establish nga prima facie evidence batok sa tawo.
Ginalantaw naman ni Novero nga problema kun wala nakita sang mga suspetsado ang itsura sang naghire sa ila bangud ang identity ang tuman ka essential sa pagpamatuod sang partisipasyon sang akusado.
Bilang practicing lawyer, halog ang ebidensya batok kay Teves kun basehan ang pahayag sang mga suspetsado nga wala nila nakita ang Congressman Teves nga naghire sa ila kundi si certain Marvin lang ang nagaistorya sa mga ini nga nagpahayag nga si Teves ang iya nga boss.
Kun may yara naman sang video ang suspect kag ang mastermind, kinahanglan nga ini ang klaro kag maathag man kun ano ang ila ginaistoryahan.
Kun criminal case ang ginaatubang sang isa ka tawo suno kay Novero, ang ebidensya nga ginarequire sang korte amo ang beyond reasonable doubt bangud kun may pagduda, ini ang maacquit.
