Nagapati ang isa ka abogado sa ciudad sang Bacolod nga may kasugtanan na sa tunga sang Timor Leste kag ni expelled congressman Arnolfo Teves Jr, amo nga indi mahapos ang pagpadeport kay Teves pabalik sa Pilipinas.
Madumduman nga naglapta ang video ni Senator Manny Pacquiao kaupod si Teves, nga amu ang akusado sa pagpatay kay Negros Oriental governor Roel Degamo.
Sa pahayag sang kampo ni Pacquiao, chance encounter lamang ini kag wala ginhungod ang ila pagkitaay sa nasambit nga airport.
Sa interview sang Bombo Radyo kay Atty Jomax Ortiz, nagapati ini nga may yara na sang kasugtanan si Teves sa Timor-Leste nga isa ka magamay nga pungsod kag lamharon pa sa ekonomiya.
Suno diri, si Teves bilang isa ka investor nga may dala nga dako nga asset para sa pungsod, ini bentaha para sa ekonomiya sang Timor-Leste amo nga wala sang kwestyon ang pungsod nga yara didto nagatinir si Teves.
Bangod sini, madugay pa gid antes makuha sang Philippine government si Teves.
Posible man nga mahatagan sang political asylum si Teves kun ini mag-request gikan sa Timor-Leste apang kun indi man gid magpahanugot ang Timo-Leste, makapangita lang man si Teves sang isa ka pungsod nga wala sang extradition treaty sa Pilipinas.
Pahayag ni Ortiz, kun mangayo naman sang bulig si President Bongbong Marcos sa Amerika, indi man ini makasalig nga makakuha sang bulig bangod para sa Amerika, ang ini nga problema pang-lokal lamang kag mas dapat nga unahon ang problema sa West Philippine Sea nga amo ang maka-apekto sa kabilugan sang Pilipinas.
