Nagapanawagan ang isa ka abugado sa ciudad sang Bacolod sa mga pumuluyo nga kinahanglan nga intsindihon anay ang nakasulat sa dokyumento nga may kaangtanan sa petition sa pag-ammend sang Article 17 Section 1 sang 1987 Constitution, bangud kun matigayon ini, wala sang may nakahibalo kun ano kag sa diin nga provision sa constitution ang bag-uhon.
Suno kay Atty. Cesar Beloria, may nagatiyog na nga tikang kag nagwa na sa mga balita sa national nga may yara na sang nagakatabo nga pirmahay kag may nagakatabo na gani nga mga pagbayad sa mga pumuluyo agud nga magpirma sa dokyumento kag agud man nga ipakita nga paagi sa Peoples initiative, maamyendahan ang Article 17 Section 1 sang constitution kag luyag nila ibutang nga ang pagbotohay dapat jointly kag gindugang pa ang “AT THE CALL OF SENATE PRESIDENT OR THE SPEAKER OF THE HOUSE” bangud ang ini nga linya ang wala nakasaad sa Article 17 sang 1987 Philippine Constitution kag ini ang nagakahulugan nga kun matigayon ang ammendment sa nasambit nga article sa constitution, bisan ang kongreso nalang ang magboto kag magpropose sang constitutional change ang mahimo na bisan indi na mag-agi sa senado.
Suno diri, samtang indi na kahulat ang kongreso sa ginaduso nga constitutional ammendment apang ang senado naman ang nagapahayag nga indi makalusot ang ginaduso nga tikang sa senado.
Gani ginalantaw sini nga bangud sa nasambit nga kabudlayan, ginadihon sa karun nga maamyemdahan ang Article 17 agud nga kun indi man magpasugot ang senado mahimo sagihapon makapropose sang constitutional ammendment ang house speaker.
Agud nga matigayon ini, may yara na sang nagalapta nga ginapapirmahan nga dokyumento kag nakasaad diri nga nakahibalo na ang nagpirma nga ang ginpirmahan sini amo ang petition nga igafile sa Commission on Elections para sa proposal nga iammend ang Article 17 Section 1 sang Philippine Constitution paagi sa People’s Initiative.
Suno diri, may yara na sang nakapirma sa nasambit nga dokyumento nagikan sa ciudad sang Bacolod gani nakakuha ini sang kopya.
Suno kay Beloria, sang ginbasa niya ang dokyumento, una pa lang nga sentence nagakahangawa na ini bangud may nakita siya nga indi na insakto ang nakasulat sa dokyumento.
Liwat sini ginpahayag nga ang pag-ammend sa fundamental law of the land ang indi malikawan bangud nakasaad ini sa constitution apang dapat nga magaagi sa husto kag nagakaigo nga proseso sabaylo nga mag-agi sa short cut.
