Wala sang may nakita nga basehan ang isa ka abogado sa Negros Occidental sa mando ni Presidente Rodrigo Duterte nga dakpon ang naga-gamit sang vape sa pampubliko nga lugar.
Madumduman nga ginmando-an ni Presidente Duterte ang mga pulis nga pagadakpon ang mga nagagamit sang vape sa public places kag ginpauntat man ang importasyon sini, apang wala pa sang official order tuhoy diri.
Sa interview sang Bombo Radyo Bacolod kay Atty. Joemax Ortiz, wala siya sang nakita nga basehan nga pwede dakpon sang otoridad ang mga tawo nga nagagamit sang vape sa mga pampubliko nga lugar bangod indi ini covered sang Executive Order 26 nga gin-issue sang tuig 2017 nga nagadumili sang pagpanigarilyo sa public places.
Kun may may yara sang ordinansa ang isa ka banwa ukon ciudad nga nagadumili sa paggamit sang vape sa public places, amo ini ang mangin basehan sang mga pulis sa pag-aresto.
Suno pa sa iya, indi mapasakaan sang kaso ang tawo nga maglapas sa Executive Order bangod indi ini layi.
