Ginapaabot sang isa ka abugado sa Negros Occidental nga may makwestyon sa constitutionality sang Anti-Terrorism Bill of 2020.
Sa interview sang Bombo Radyo kay Atty. Jomax Ortiz, magasupak sa human rights ang amo nga layi kag sa oras nga ginpahanugutan ang amo nga layi, ginapahanugutan naman nga mangin diktador ang presidente sang Pilipinas.
Ginaalegar man sini nga mangin robot ang mga congressman sa kasuguan sang presidente.
Suno diri, magafile ang mga abogado sang kaso sa husgado kun ipilit ang amo nga layi.
Kun mahanugutan suno sa iya ang presidente nga mag-angkon sang otoridad, sarang na sini nga mapadakop ang mga kontra sini apisar nga wala sang rasonable nga kabangdanan.
kag pagatunaan ini sang civil protest kag isa gid ini sa gilayon nga makigbahin.
Pahayag man sini nga dapat hulaton anay sang gobyerno nga masarangan na ang problema batok sa COVID-19 pandemic antes magpasar sang wala kaangtanan nga kasuguan.
Nagapamatok ini sa layi bangod ang executive department ang magadesisyon kag madulaan na sang gahom ang judiciary.
May yara naman ini sang nahibaluan nga may isa ka grupo nga nagapreparar na sang petisyon nga ginakwestyon ang legality sang layi.
Indi man ini kumporme nga pila lang ka bahin sang provision ang pamalabagan kundi hugot sini nga ginapatihan nga dapat punggan ang kabug-usan nga layi bangod klaro ini nga pagsupak sa humanitarian rights sang mga Pilipino.
Suno sa anay alkalde, ang pagboto sang mga congressman ang pamatuod ng ginakulbaan ang mga ini.
Ginklaro man sini nga indi ini patas sa mga grupo nga yara sa kabukiran bangod sa gamay lang nga indi pag-intindihanay, posible na sila nga mapadakop.
