Ginpahayag sang abugado sa syudad sang Bacolod nga hulaton dapat sang secretary of justice ang paggwa sang resolution nagikan sa mga prosecutors antes naghatag sang pahayag angot sa dalagan sang kaso sang pagpatay kay Negros Oriental Governor Roel Degamo agud malikawan ang malisya sang partiality.
Sa interview sang Bombo Radyo Bacolod kay Atty. Jomax Ortiz, una gid nagpagwa na sang pahayag si Justice Secretary Remulla nga 99.9 percent case solved na ang kaso, apang sa sini nga punto kuntani wala anay nagpagwa sang pahayag ang natungdan nga ang mastermind sang pagpatay kay Negros Oriental Roel Degamo amo si Negros Oriental 3rd District Congressman Arnolfo Teves bangud wala pa sang ginpagwa nga resolution ang prosecutors sang isa ka committee ukon Task Force nga may kaangtanan sa kaso.
Suno kay Ortiz, bangud wala sang resolution nga ginpagwa ang mga prosecutors kag ginfile sa korte, ang pahayag ni Remulla ang mahimo nga mamis-interpret ini kag magwa nga may yara na ini sang partiality sa kaso.
Suno kay Ortiz, ang dapat kuntani antes nagpagwa sang opisyal nga pahayag si Remulla nga si Teves gid man ang mastermind dapat may yara na sang official docket ang kaso nga ginfile sa korte nga nagatudlo sa kongresista nga ini gid ang mastermind sa pagpatay sa gobernador kag walo ka iban pa.
