Welcome development kag gindayaw sang Alliance of Concerned Consumers in Electricity and Social Services (ACCESS) ang mga lihok nanday Negros Occidental 3rd District Representative Javiel Miguel “Javi” Benitez kag Bacolod City Lone District Representative Alfredo “Albee” Benitez matuhoy sa power crisis sa Visayas.
Sa interview sang Bombo Radyo Bacolod kay ACCESS President Wennie Sancho, nagapati ini nga nakita sang mag-amay nga kongresista ang hibubun-ot kag pag-antos sang mga pumuluyo bangod sa adlaw-adlaw nga brownout.
Panindugan niya nga ang duha ka oras nga brownout ang indi na dapat isukot sa mga konsumedor, bangod ini ang wala man nagamit sang mga pumuluyo.
Ginahulat na lamang nila ang memorandum gikan sa Energy Regulatory Commission (ERC) para sa regional price cap sa Visayas, kun sa diin mabuhinan sang masobra katunga ang August 2026 electric bill.
Ginalantaw ni Sancho nga ini ang pampa-umpaw na lamang matapos makita nga akig na ang mga pumuluyo.
Panawagan sini sa iban pa nga mga kongresista nga updan ang lihok sang mag-amay nga Benitez.
Wala man ini nagakumpormi sa pahayag sang National Grid Corporation of the Philippines (NGCP) nga kaangay nga sila ang wala sang responsibilidad bangod sila ang transmission lamang.
Apang pahanumdom ni Sancho nga bangod national operator ang NGCP, sila ang may kaangtanan gid sa tanan nga aspeto sang power industry, gani indi dapat magpanghinaw kag magbulig sa pagpangita sang solusyon.
Suno sa iya, dapat maghuman sang policy direction ang ERC kag NGCP, bangod indi deserve sang mga pumuluyo nga nagabayad sang husto ang adlaw adlaw nga brownout.
