Ginpahayag sang Bacolod Police Station 2 nga isa ka accidental firing kag indi pag-utas sa kabuhi ang gintunaan sang kamatayon ni Private First Class Erwin Pendon, active member sang 11th Infantry Battalion.
Madumduman nga una nga ginpahayag sang kapulisan nga gintiro ni Erwin ang iya kaugalingon matapos sila nagbaisay sa iya asawa nga si Leonora Billones Pendon sa Purok Tilapia, Brgy 3, Bacolod City.
Bangud sini ginbuno man sang iya amay nga si Edwin Pendon ang iya umagad.
Sa interview sang Bombo Radyo kay PLt Conan Gadayan, Officer in Charge sang Police Station 2, ginpahayag sini nga naggwa sa ila imbestigasyon nga samtang nagbinaisay ang mag-asawa, nagkuha sang armas si Erwin tubtob nga ini ang nagpalupok sa dingding.
Sa ikaduha nga pagpalupok sini sang armas, aksidente nga natirohan ni Erwin ang iya ulo nga nagresulta sang iya kamatayon.
Natalana naman nga ipasaka ang kaso nga homicide subong nga adlaw batok kay Edwin paagi sa inqueest proceedings.
