Ginkwestyon sang Alliance of Concerned Teachers – Negros Island Region Union ang ginakabig nila nga pagbasol sa mga manunudlo sa mga nagakatabo nga school violence, sa baylo ila naman ginasukot ang tikang sang gobyerno angot sa issue.
Ini angod sa kontrobersyal nga pahayag ni Palace Press Officer Undersecretary Claire Castro sa iya pagpagwa sang statement angot sa school shooting sa Zamboanga, kun sa diin ginhambal niya nga may pila ka manunudlo nga nagatudlo sa mga kabataan nga mangin wala sang modo.
Sa interview sang Bombo Radyo Bacolod kay ACT NIR Union Secretary General Grace Abellar, apisar nga ‘pila ka manunudlo’ ang pahayag ni Castro, para sa ila ini ang masakit gihapon bangod kaangay nga sa manunudlo ginatudlo ang basol imbes nga sila ang nagahimo sang tikang agud mapunggan ang kaangay nga insidente.
Madumduman nga kalakip man sa ginhimo nga halimbawa ni Castro ang pagbisita ni President Ferdinand Marcos Jr sa eskwelahan sa Davao City, kag siya ang ginbuyayaw kag gin-insulto sang pila ka estudyante.
Panindugan ni Abellar, nga wala sa ila curriculum ang pagtudlo sa kabataan nga mangin wala sang modo, kag sila ang mas wala nagatudlo sa kabataan nga magdala sang armas.
Dugang pa sini nga kaangay sa risgo sa mga kabataan, ang kaangay nga mga school violence ang risgo man sa mga manunudlo.
Apang imbes nga magbulig ang gobyerno agud ini ang matapna, para sa ila, kaangay nga nagapangita lamang ang mga ini sang basulon
Pahanumdom ni Abellar kay Castro nga tsekyaron man kun ano ang nahimo sang gobyerno angot sa issue.
Suno kay Abellar, kun ang ginikanan nga may isa lamang ka bata ang indi makadisiplina, indi gid maka-ekspektar nga madisiplina sang manunudlo ang 30 tubtob 40 ka estudyante sa kada klase.
Nagapati ini nga gikan sa panimalay ang dako nga factor sang kalain sang buot, stress, frustrations kag anxiety sa mga kabataan nga nagaresulta sa bayolente nga pagginawi.
Pahayag sini nga madamo sang ginikanan nga indi naman maka-ubay sa ila kabataan bangod ang gab-i ginahimo na nga adlaw sa pagtrabaho para sa pamilya bangod sa tuman ka gamay nga sweldo.
Sa pihak sini malala pa ang kurapsyon sa gobyerno, kag ang wala untat nga baslanay sang pagpakamalaot sang mga nagapamuno sa gobyerno, nga nagakakita man sang kabataan.
Panawagan sang ACT-NIR sa gobyerno nga maghatag man sang suporta sa sektor sang edukasyon, kalakip na sa student kag teacher’s protection.
