Indi kompormi ang Alliance of Concerned Teachers – Negros Island Region (ACT-NIR) sa ginaduso ni Senator Bam Aquino nga P10,000 nga salary increase para sa mga manunudlo nga matunga sa tatlo ka tranches.
Nahibaluan nga sa Angat Sweldo Para sa Guro Act ni Senator Bam Aquino, chairman sa Senate Committee on Basic Education, ang salary increase ang matunga sa P4,000 sa una nga tuig, kag masundan sang P3,000 sa kasunod nga duha ka tuig.
Luwas diri, may-ara pa sang P1,000 nga annual monthly allowance para sa Medical Checkup.
Sa interview sang Bombo Radyo Bacolod kay ACT-NIR Secretary General Grace Abellar, madugay na ang panawagan sang mga manunudlo sa saka sa sweldo.
Sila ang indi naman kumporme sa Salary Standardization Law nga nagapasaka sang P1,500 kada tuig bangod ini ang nagakahulog lamang sa pagsaka sang mga compulsory deductions kaangay sang Government Service Insurance System (GSIS), PhilHealth kag Tax.
Dugang pa sini nga ang mga manunudlo ang nagapanabon pa sa mga galastuhan sa pag-imprubar sang classroom kag iban pa nga kaayuhan sang mga kabataan nga indi macover sang Maintenance and Other Operating Expenses (MOOE).
Suno kay Abellar, imbes nga maghatag sang P10,000 nga salary increase nga utay-utay, mas nagakaigo nga aprubahan na lamang ang nauna na nga ginduso nga mapasaka sa P50,000 nga entry level salary para sa Teacher 1.
Paathag sini nga ang suhestyon nga saka sa sweldo nga ginaduso sang ACT sa sulod na sang tatlo tubtob lima ka tuig, ang nakabase sa ginhimo nga pagtuon.// Nagapati ang mga ini nga masaragan sang gobyerno ang nasambit nga pagsaka sa sweldo.
Ini bangod nga nakita na nga mahapos lamang para sa pila ka mga opisyal nga magbulsa sang bilyon-bilyon nga pondo nga mas dako pa sa kinahanglan nga salary increase sang Department of Education.
