Apisar sa dako nga pagtaas sang budget sang Department of Education (DepEd), indi kumpormi ang Alliance of Concerned Teacher’s – Negros Island Region bangod wala gihapon malakip sa budget ang salary increase nga madugay na nga ginapanawagan sang mga manunudlo kag school personnel.
Sa interview sang Bombo Radyo Bacolod kay ACT-NIR Secretary General Grace Abellar, apisar nga sa maragtas, ang subong nga 2026 ang pinakamataas nga budget sang DepEd nga nagdangat sa P1.015 trillion, ini ang kulang gihapon.
Paathag sini nga santo sa konstitusyon, dapat nga 6 percent sang Gross Domestic Product (GDP) ang DepEd budget, apang ang karun nga budget ang yara lamang sa 4.4 percent sang GDP.
Dugang pa sini nga problema man sa paghatag sang budget amo ang prayoridad.
Halimbawa sini ang natabo nakaligad nga tuig kun sa diin may natalana nga budget para sa pagtukod sang mga classrooms, apang 22 ka classrooms lamang ang napatukod.
Suno diri, ang mga kapulisan kag militar ang wala sang problema bangod mahumok lamang ang pagpasaka sang ila sweldo.
Sa baylo, ang mga manunudlo nga tinuig na nga nagapanawagan sang salary increase ang waka ginasapak.
Pahaumdom sini nga ang pagpasaka sang sweldo ang makabulig man sa paghatag pa nila sang kalidad nga pagtudlo.
Panindugan ni Abellar nga kulang ang P1,500 nga saka sa sweldo kada tuig sa idalom sang Salary Standardization Law.
Dugang pa sini nga ginveto pa ni President Ferdinand “Bongbong” Marcos ang kuntani benefits para sa mga magaretire nga manunudlo.
Kasubong man ang budget para sa hiring ukon pagregularize sang mga contract of service ukon job order employees nga maga-apekto man sa mga teaching personnel sa mga state universities and colleges (SUCs) nga contractual employee lamang ang status.
Para kay Abellar, indi makatawo kag indi patas nga madamo gihapon sang mga ginpasulod sa unprogrammed appropriations ukon pork barrel para sa mga kongresista kag senador.
